An t-Eilean Muileach

An t-Eilean Muileach, an t-eilean àghmhor,
An t-Eilean grianach mu'n iath an sàile;
Eilean buadhmhor nam fuarbheann àrda;
Nan coilltean uaine, 's nan cluaintean fàsail

1

Ged tha mi 'm 'fhògarrach cian air m'aineol
'S a' Chaisteal Nuadh, 's an taobh tuath de Shasunn,
Bith'dh tìr mo dhuthchais a' tigh'nn fainear dhomh,
An t-Eilean Muileach bu lurach beannaibh

An t-Eilean Muileach, etc.

2

B'fhallain, cùbhraidh 's bu réidh an t-Sailean,
Le 'bhlàthan maoth-bhog 'bu chaoine fàileadh:
Bu ghlan na bruachan mu'n d'fhuair mi m'àrach
An Doire-'chuilinn aig bun Beinn-bhàirneach.

An t-Eilean Muileach, etc.

3

Air Lusa chaisleach nan stac 's nan cuartag,
Bhiodh bradain thàrr-gheal nam meanbh-bhall ruadh-bhreac,
Gu beò-bhrisg, siùbhlach, le sùrd ri lùth-chleas
'N a cuislibh dù-ghorm gun ghrùid, gun ruadhan.

An t-Eilean Muileach, etc.

4

Bu chulaidh-shùgraidh do dh 'òg fhir uallach,
Le gathan tri-mheurach, rinneach, cruaidh-ghlan,
Air caol-chroinn dhìreach, gun ghiamh, gun chnuac-mheòir,
'Bhi toirt nan làn-bhreac gu tràigh mu bruachan.

An t-Eilean Muileach, etc.

5

'Be'n sòlas-inntinn leam a bhi 'g èisdeachd
Ri còisir bhinn-ghuthach, ghrinn a' Chéitein
A' seinn gu sunndach an dlùth 's nan geugan -
A' choill' fo liath-dhealt', 's a' ghrian ag éirigh!

An t-Eilean Muileach, etc.

6

Chlaon gach sòlas dhiubh sud mar bhruadar,
'S mar bhristeadh builgean air bhàrr nan stuadh-thonn:
Ach soraidh slàn leis gach loinn 'us buaidh
A bh'air eilean àghmhor nan àrd-bheann fuara.

An t-Eilean Muileach, etc.